umulan ka pa habang kami ay naglalakad
upang hindi siya makatangging payungan ko siya
nang sa gayon kami ay magkalapit
at kapag bumuhos ka pa ng malakas
mapipilitan siyang yumakap sa akin
sa mga manunulat,
masasabi kong ako ay 'torpe'
kasi naman hindi masabi ng aking bibig
ang lahat ng sinasabi ng aking puso
gusto ko mang umamin sa iyo
nauutal ang aking dila sa tula na nilikha ko
buhos pa ulan...
ikulong mo kami sa iyong kanlungan
paglapitin mo ang aming mga puso
kagaya sa isang hawla ng mga nag-iibigang maya
hindi man ako makaawit nang kagaya nila
kumakabog naman ang aking puso
at lumulukso sa sobrang tuwa
buhos pa ulan
at hayaan mo kaming magtampisaw
sa kaligayahan ng sandali
na ayaw ko rin namang lumipas
umihip ka pa at lumakas
upang hayaan niyang
sa aking likod ay pasanin ko siya
at nang sa gayon ako ay mayakap niya
at nang sa gayon siya ay aking mapasaya.
DenMar
