Gamitan

Ito ang pinaka-ayokong mangyari
Ang dumating ang panahong
Masusubok ang ating pagkakaibigan
Kung saan mapipilitan tayo
Na ipakilala ang ating mga sarili
Hindi sa isang pormal na pagkakataon
Kundi sa dagliang sandali

Kung kailan dumating ang panahon
Na wala na akong matatakbuhan kundi ikaw
Ikaw na natutunan kong mahalin
Nang higit pa sa aking sarili
Hindi man ako naghahangad ng kapalit
Subalit ito ay pangyayari
Na kailangan kong tumakbo
Sa isang tao na alam kong
Hindi ako pahihindian

Subalit
Sa unang pagkakataon
Matapos ng aking pagbibigay
Matapos ang aking pagtitiwala
Ramdam kong pinagdamutan mo ako
Hindi ako makapaniwala
Dahil matapos ang mahabang panahon
Sa lahat ng kagustuhan mo
Pinagbigyan kita
Ang isusubo ko na lamang
Ay ibinahagi ko pa sa iyo

Gayong ang hinihingi ko
Ay para naman sa akin
At hindi naman para sa iba
Pinilit kong isa-isahin ang lahat ng rason
Hindi kasi ako makapaniwala
Sa kadamutang bumulaga sa aking mukha
Pinilit kong itanggi na hindi ka ganoon
Subalit narinig ko mula sa iyong mga labi
Ang mga kataga
Na pawang kasinungalingan
Na pawang pagtanggi
Na wala ka pero meron akong nakikita
Na sobra-sobra pa para sa iyo
Na ang karampot man lamang nito
Ay hindi mo magawang maibahagi...

"Sayang ang pagkakaibigang inilaan ko sa iyo..."
Mapait kong nasabi ito sa aking sarili
Sana hindi na umabot ang pagkakataong ito
Kung saan mabubunyag ang iyong pagkatao
Nawa'y gabayan ka ng Dyos
Ikaw na inakala kong magiging aking takbuhan
Matapos ng aking lahat ng aking kabutihang loob
At paghingi ng isang bagay na hindi naman kalabisan
Ikaw na halos pakainin ko sa aking sariling palad
Ang magdadamot sa akin ng ganito

Hindi na ako aasa pa sa ibang pagkakataon
Sa maliit na bagay na ito
Tinanggihan mo na ako
Napatunayan kong ginamit mo lang ako
Kung kaya dumudugo ang aking puso
Kung kaya umiiyak ang aking pagkatao





Br. Dennis DC. Marquez, sSSS