May dalawang bagay akong naiisip
Upang manatili akong nagmamahal sa iyo
Una ay ang pag-ibig
Pangalawa ay ang kalayaang magawa ko ang nais kong gawin
Pag-ibig...
Ang ibigin kita ay isang magandang dahilan
Upang ako ay magtiis ng mga pasakit
Ang ibigin mo ako ay ang mapasaakin
Ang langit na aking pinapangarap at nilulunggati
Kung walang pag-ibig
Walang pagtitiis na mangyayari
Walang pangarap na mabubuo
Walang pangakong tutuparin
Kung hindi ko man magawa ang nais ko
Magiging maligaya ako sa bisig mo
Isuko ko man ang mga pangarap ko
Magiging maligaya pa rin ako sa piling mo
Kalayaan...
Pinapangarap kong mula sa mga kaya kong gawin
Ay matutunan mo rin akong mahalin
Kahit na mangahulugan pa ito
Ng aking buong buhay na pagtitiis
Ang kalayaan para sa akin
Ay yung makakahinga ako
Kung sakaling mapagod ako
Sa pag-unawa sa iyo
Kalayaan para sa akin
Ang magawa ko ang isang bagay
Na pinili ko
Sa oras na ito
Dahil ngayon pa lang
Inaamin ko na sa iyo
Na nabihag mong ganap
Ang puso kong tapat
Dahil sa pag-ibig
Na aking iaalay sa iyo
Nakahanda akong magtiis
Iyon ay kung pahihintulutan mo
Subalit kung igagapos mo lang ako
Sa kabiguan ng kawalang pag-asa
Hayaan mo na lamang akong
Masaktan pansamantala
Dahil hindi rin naman magbubunga
Ang alin mang pag-ibig
Kung hindi ito makalalago
Mula sa ating saradong mga puso
Kung hindi mo ako iibigin
O kung hindi ko magagawa ang nais kong gawin
Pipigilin ko lamang ang oras
At mabubuhay lamang sa panaginip
Mabuti pang ngayon pa lang
Ako ay masaktan mong ganap
Upang maibaling ko na lamang
Ang pag-ibig ko sa kapwa nagmamahal
Ito ang kalayaan kong nais
Ang kalayaan kong piliin
Kung kanino ko maiaalay
Ang aking wagas na pag-ibig
Oo...walang pag-ibig
Kung walang pagtitiis
Subalit wala ring kalayaan
Kung walang pusong pag-aalayan...
Dennis DC. Marquez
