Biktima

Animo’y nagsalpukan ang dal’wang dakilang puso
Nagpuyos sa galit, mga nagbabagang prinsipyo
Isinatitik ay sumpa na lumatay sa pagkatao
Habang umalingawngaw ang huwad na luha ng palalo.

Tinig ng biktima ay ngayo’y nananaghoy
Nang katarungan, ng pag-asa sa paglilitis ng tao
Bumibigkas ng mga usal sa bawat tinging matalim
Nangangatal sa pagkatakot sa kabila ng pagkagalit.

Habang pinupulot ang tagni-tagning katarungan
Kumakatok sa bawat liwanag ang ugong ng katotohanan
May hanging nakarinig sa dalamhati’t nakiramay
Upang ihatid ang puntod sa matawil na lapastangan.

Hihilom pa ba ang hapdi ng sakit ng kamatayan?
Nang bawat naulila't naging saksi sa digmaan
May mga tanong sa bawat tanong ang itinatanong
May mga nakakubli sa bawat kublihang ikinukubli.