KAMAY NG ISANG ANGHEL

(Alay sa mga batang nagsa-sakada)

Muling iniambay mula sa kalawakan
Kamay ng isang anghel na sinunog ng araw
Igagapas sa tubuhang minana sa nakaraan
Gaya ng pagkaalipin, di-alam kung sa’n nagmula.

Mga kamay na kay’liit subalit maliksi
Nagpupumilit maging hutok ‘pagkat aba at api
Walang pangarap kun’di kalayaan ay makamit
Sa tubuhang hindi pag-aari subalit naghahari.

Kumakalam na sikmura ang lakas araw-araw
Pag-asa’y nilagas ng kawalang katarungan
Tubo’y ibinabaon kasabay nang dangal
Mamanahan ay luha at bigong ala-ala.

Tigang na lupain ang papel na sulatan
Kung saan sinasatitik ang pag-asa ng buhay
Sa bawat pagkalahig, kabigua’y ‘di-alintana
Pagkat pinanday ng pangarap ang murang kaisipan.

Kamay na pagal ang kalasag at sandata
Sa laban ng buhay pagmamahal ang sandigan
Apoy sa dibdib nagsisimulang mag-alab
Gaya ng mga lumisan na nagpamana ng laban.




Br.Dennis DC. Marquez, sSSS