Sa gitna ng dilim
Na agaw liwanag
Pusikit na pag-asa’y
‘Di-mabanaag
Lahat ng palahaw
Nilamon ng pangarap
Luhang pumatak
Sa daigdig ay pumanaw.
Lupaypay na katawan
Pagal na isipan
Uhaw na damdamin
Nagngangalit na bagang
Duguang mga palad
Sumusukong kamay
Pulang watawat
Sa hangi’y kumaway.
Libingan ng ala-ala
Kaluluwang lumisan
Mga matang nakatingin
Bulag sa katotohanan
Pagdurong mapanlibak
Bulaang mga salita
Humahalakhak sa pagkakasala
Ang mga imbing taliwas.
Mga tupa’y nakamasid
Nakagiti sa katayan
Walang muwang sa kaganapan
Sa kahayupang tumambad
Nagtataka’t nagtatanong
Sa pagbabago ng hangin
Ang dating pulo’t gata’y
Langis at tubig na.
Butas na bulsa
Yaman ay kaisipan
Kumakalam na tiyan
Dangal ang kabusugan
Pagod na mga paa
Katotohanan ang landas
Sumusukong katawan
Katarungan ang lunas.
No comments:
Post a Comment