Patawarin mo ako kung ako'y naging mapangahas
kung sa pakiramdam mong ikaw ay aking nasaktan
nadala lamang ako ng simbuyo ng aking damdamin
dahil ang buong akala ko, ikaliligaya mo ang nagawa ko
Hindi ka kumikibo ng matagal na panahon
sumasabay ka lamang sa aking mga pagtawa
sa bawat kwento ko akala ko'y ikaw ay nakikinig
subalit sa kalooban mo, naroon pala ang hinanakit
Hanggang isang araw, sumabog ka na lamang
isinumbat mo ang lahat ng iyong kinikimkim na galit
sa pagkakataong ito hindi mo ako binigyan ng pagkakataon
upang magpaliwanag at humingi sa iyo ng paumanhin
Akala mo siguro mahirap akong paliwanagan?
marahil sa maraming pagkakataon nasasaling kita
subalit hindi nangangahulugang sarado ang aking puso
upang ang iyong nasaktang damdamin ay aking unawain
Sa iyong paglisan, saan kita hahahanapin?
sa iyong pagtatampo, paano kita aamuhin?
ngayon ay napagtanto kong may dahilan ka upang magalit
dahil hindi ko nagawang ikaw ay ganap na kilalanin...
Br. Dennis DC. Marquez, sSSS
No comments:
Post a Comment